طلعت شناعة
نحنُ « الشعب»، عادة ما «نتشاطر» على الحكومة ( أية حكومة). ونتّهمها «ع الفاضي وع المليان». و»حرام» الحكومة «ساكتة»،رغم إنها « متينة « و»قويّة» مثل « سِلفة» صاحبتي.
تعالوا، «نقلب» الموضوع،و»نتخيّل» الحكومة تنتقد « الشعب» الذي هو مجموعة من « الكائنات» الاليفة وغير الأليفة.
وانا هنا، وبحكم « انشغالي بالفن»، سوف «أتقمّص» دور « الحكومة» و»أتخيّل» حالي أتحدث «بلسانها» مع الاحترام لمعالي الناطق الرسمي:
* عملنالكم ارصفة.. و بتمشوا بنصّ الشارع .
* بتكبوا زبالتكم في أي مكان بالليل و بالنهار.. بتلاقوها نظيفة .
* فتحنا لكم مدارس ونجحنالكم «طناجر» و «الواحد بخلّص توجيهي و ما بعرف يكتب اسمه» .
* انتم من احسن الشعوب التي تكتب شيكات.. بدون رصيد . ومع ذلك «بتحط الحق ع الحكومة»!
* ما عندكم مبدأ …رايح مع الرايح و جاي مع الجاي .
* شعب «مشكلجي».. و كم قتيل راح بسبب نظره بالغلط ؟ او في مباراة كرة قدم؟
* في الانتخابات، بتبيعوا أصواتكم بعشرة دنانير و بتجيبوا برلمان «على مقاسكم» و بالآخر بتسبوا «علينا» وعليهم .
* تدّعون انكم «مفلسين» و»كلكم راكبين سيارات فاخرة» .
* شعب «دموي» بيّطخ بالأفراح وبتموت ناس بالاعراس وبنتائج التوجيهي ولما الواحد «يطهّر « ابنه، و بتتزوجوا على «أغاني الحرب» … خلينا نشوفكم وقت الحرب .
* شاطرين بالإشاعات و بتكذبوا الكذبة و بتصدقوها .( ما حبيتها منكم ).
* بتسبوا عالاجانب وبتقولو عنهم «كُفّار «. وما بتصدقوا ودولة غربيّة تفيّزلكم … بتروحوا وما بترجعوا .
* الزراعة صارت بالنسبة الكم «عيب» حتى بارت الارض و صارت غير صالحة . للدقّة « الارض» زعلانة منكم.
* بالتجارة.. بتفضلوا « بضاعة « الصين اللي مش أصلية. و بدكم الرخيص يعيش.. للابد .
* بنتقدوا « الوزراء» وكلكم بدكم تصيروا مسؤولين و «وزرا « .
* من كشرتكم.. هربوا السياح .
*****
بيكفّي والاّ أكمّل..؟
فكركم « الحكومة» عاجبها اللي قلته ؟
.. ما ظنيت !!
